బ్లాగ్ సత్తా. ఇది మీ సత్తా!

by admin@ 24fps

ఇవాళ దాదాపు ప్రతి ఒక్కరికీ internet అందుబాటులోకి వస్తోంది. మన దేశంలో పరిస్థితి ఇంకా మెరుగుపడాలి కానీ US మరియు UK లలో ఉచితంగా కంప్యూటర్ల పంపిణీ, ఉచితంగా internet లాంటి పథకాలు ఇప్పుడిప్పుడే ఊపందుకుంటున్నాయి.

ఇదంతా చూస్తుంటే రోటీ, కపడా, మకాన్ లతో పాటు త్వరలో internet కూడా ఈ లిస్టులో చేరినా ఆశ్చర్యంలేదు. internet అందరికీ అందుబాటులోకి వచ్చేస్తుండడంతో బ్లాగులూ విపరీతంగా పుట్టుకొస్తాయి. ప్రతి ఒక్కరూ తమ అనుభవాలనూ, ఆలోచనలనూ, ప్రతిస్పందనలనూ అందరికీ తెలిసేలా చేయడానికి బ్లాగులు సుగమం చేసేసాక మన తెలుగులోనూ బ్లాగులు బాగానే పుట్టుకొస్తున్నాయి. కానీ వీటికి ఇంకా ప్రచారం కలగాలేమో అనిపిస్తుంది. తెలుగులో రాసే ప్రతి బ్లాగరి ఇంకా ఎక్కువ బ్లాగర్లను సృష్టించడానికి కృషిచేయాలి.

తెలుగులో బ్లాగర్లు ఇంకా తమ గళాన్ని ప్రపంచానికి ఇంకా గట్టిగా వినిపించడానికి ఇంకా కొద్ది సమయం పట్టొచ్చేమో గానీ రానున్న కాలంలో ఫలానా పత్రిక వాడు ఫలానా పార్టీకి తొత్తు అనో, ఫలానా పర్టీ గురించి ఎప్పుడూ వ్యతిరేకంగా మాత్రమే రాసే పేపరనో బాధ పడుతూ వార్తా పత్రికలు చదవాలసిన అవసరం రాదేమో!

ఉదయం లేవగానే కొత్తపాళీ ఏ కొత్త విషయం గురించి రాసారనో, రానారె కథ లు ఎప్పుడెప్పుడు వస్తాయనో, కృష్ రాం ఏ కొత్త సినిమా చూసాడనో, చరసాలలో ఎవరిని శిక్షిస్తున్నరో, ఇవ్వాళ ఏ సత్య శోధన జరిగిందో, కొత్త పుస్తకం గురించి సౌమ్య తెలుసుకుందామనో, లాదా కొత్త టెక్కునిక్కు ఏదైనా తెలుసుకుందామనో, ఏమీ పొద్దు పోక ఒకటి,రెండు,మూడు, నాలుగు లెక్కపెట్టుకుందామనో, కాసేపు అన్నీ గాలికొదిలి క్రాస్‌రోడ్స్ లో నిల్చుందామనో ఎదురుచూసే రోజు త్వరలోనే వస్తుందని నా ఆశ. అలాగే సినిమా సైట్ల పేరుతో అడ్డమైన గడ్డీ తినీ చెత్త సినిమాలకు అడ్డగోలు ప్రచారం కల్పించే సైట్లకూ చెక్ పెట్టే సత్తా కూడా బ్లాగర్లకుందనీ నాకు నమ్మకం. ఇప్పుడు చెత్త సినిమాని చెత్త సినిమా అని ధైర్యంగా చెప్పొచ్చు అలాగే మంచి సినిమా గురించి ప్రోత్సాహమూ కల్పించవచ్చు.

కానీ ఎంత చెప్పినా బ్లాగు బ్లాగే, పత్రిక పత్రికే అని చాలా మంది అనడం విన్నాను. బ్లాగంటే ఎదో సరదాకి రాసుకునే ఒక డైరీ అని చాలా మంది అభిప్రాయం. నిజమే కానీ కొంత మంది డైరీలే అధ్భుత గ్రంధాలయిన సంధర్భాలు ఎన్ని లేవు?

మరి అలాంటప్పుడు బ్లాగర్ను జర్నలిస్టుగానో రచయితగానో పరిగణించవచ్చా?

నా దృష్టిలో అనొచ్చేమో అనిపిస్తుంది.

గత ఏడాది Baghdad Burning అనే బ్లాగులో సంవత్సరం పాటు రాసిన వ్యాసాలన్నింటినీ సేకరించి “Baghdad Burning” – the book అని ప్రచురింపబడటమే కాకుండా Lettre Ulysses Award for the Art of Reportage 2005 అవార్డును కూడా సాధించింది.

అలాగే మన దేశ బ్లాగర్లకు ప్రభుత్వం accreditation ఇవ్వనున్నట్టుగా రెండేళ్ళ క్రితం ఇక్కడ ఒక వార్త వచ్చింది. ఆ పని ఎంతవరకూ వచ్చిందో తెలియదు కానీ మొన్న జరిగిన Cannes చిత్రోత్సవానికి కొంత మంది ప్రఖ్యాత సినీ బ్లాగర్లకు కూడా Press accreditation ఇచ్చారని ఎక్కడో చదివాను. US లో Democrats 2004 నుంచే బ్లాగర్లకు press accreditation ఇవ్వడం మొదలుపెట్టారు. వారి లాగే UK లో లేబర్ పార్టీ కూడా తమ conference లకు press తో పాటూ కొంత మంది ప్రముఖ బ్లాగర్లను ఆహ్వానించాలని నిర్ణయించారు. కావాలంటే ఇక్కడ లేదా ఇక్కడ చూడండి.

దీన్ని బట్టి చూస్తే రాబోయే కాలంలో బ్లాగర్లు జర్నలిస్టులతోనూ, బ్లాగులు వార్తా పత్రికలతోనూ పోటీ పడే అవకాశం వుంది. నిజం. మీకిప్పటికీ నమ్మకం లేకపోతే వినండి.వచ్చే నెల 17 నుంచి లండన్ లో జరగబోయే ప్రతిష్టాత్మక చలన చిత్రోత్సవానికి నాకు press accreditation వచ్చింది. నేనేమీ పత్రిక విలేఖరిని కాదు. అలాగే నా బ్లాగు ప్రపంచ ప్రక్యాతి గాంచినదీ కాదు. రెండు వారాల ముందు నాకు press accreditation ఇస్తారా అని apply చేస్తే ఏం చూసి నీకు press accreditation ఇవ్వాలి అని నన్నడిగితే నా సైటు www.24fps.co.in గురించి అందులో గత 6 నెలలుగా ఏమేం రాసాను, ఎందుకు రాసాను అని తీరిగ్గా చెప్పాక పరిశీలిస్తాం అనడంతో కొంచెం ఆనందం కలిగింది. ఇవ్వము పో అనకుండా కనీసం పరిశీలిస్తాం అనడం మేలే కదా అనుకున్నా. ఈ రోజు ఇంటికొచ్చే సరికి పోస్టులో లండన్ చిత్రోత్సవానికి సంబంధించిన పాస్ వుండడం చూసి కొద్ది సేపు నోట మాట రాలేదు. అంతా బ్లాగు మహిమ. తెలుగులో బ్లాగొచ్చు అని తెలియచేసి, అలా బ్లాగడానికి సహాయపడి, నా బ్లాగుని ప్రతిరోజూ చదివి వ్యాఖ్యలు రాసి నాకు ప్రోత్సాహం కలిగించిన వారందరికీ కృతజ్ఞతలు.