నినుకోరి…..మోహనం

by admin@ 24fps

కర్ణాటక సంగీతం ఖచ్చితంగా విని తీరాల్సిందే లేకపోతే మీరు మన సంస్కృతికి పెద్ద అన్యాయం చేసినట్టే. కాకపోతే చాలా మందికి ఎక్కడ మొదలుపెట్టాలో తెలియక, సరిగ్గా guide చేసే వాళ్ళు లేక కొంచెం కష్టాలు పడుతుంటారు. నేనూ మొదట్లో ఇలాంటి తిప్పలే పడినా ఇప్పుడు పరిస్థితి కొంచెం మేలయ్యింది.అందుకు చాలానే కారణాలున్నాయి.

1)అంతర్జాలం లో కర్ణాటిక్ సంగీతం గురించి వున్న వ్యాసాలు
2)www.musicindiaonline.com లో వున్న సంగీత సంపద
3)నా శ్రీమతికి కర్ణాటక సంగీతంలో మంచి ప్రవేశం వుండడం
4)పిల్లనిచ్చిన మామ గారు కర్ణాటక సంగీతం గురించి సమీక్షలు, విశ్లేషణలు రాయడం
5)అన్నిటికంటే ముఖ్యంగా మంచి సంగీతం వినాలన్న తపన

మీకూ నాలా మంచి సంగీతం వినాలని తపన వుంటే ముందుగా కొంచెం తేలికైన పాటలు వినడం మంచిది. మీకు ఇంతకుముందు కర్ణాతక సంగీతం గురించి పెద్దగా అవగాహన లేకపోతే మోహనం రాగంతో ఆరంభించడం మేలని నా అభిప్రాయం. ఘర్షణ(పాత) సినిమాలోని “నిన్నుకోరి వర్ణం” పాట ఈ రాగం లోనిదే.

ఫలానా పాట ఏ రాగంలో వుంది అని ఎలా తెలుసుకోవాలి అంటే, అందుకు సమాధానం చాలా కష్టమే! కాకపోతే వినగా వినగా మీకే తెలిసిపోతుంది. కావాలంటే మీరూ ప్రయత్నించండి.

ఉదాహరణకు త్యాగరాజ స్వామి వారి కృతులైన “రామా నిను నమ్మిన“, “నను పాలింప నడచివచ్చితివో “, “భవనుత” లాంటివి వింటే మీకు అర్థం అవుతుంది ఘర్షణ సినిమాలోని “నిన్నుకోరి వర్ణం” మోహన రాగంలో వుందని.

కొత్త పాట వింటున్నప్పుడు అది ఏ రాగంలో వుందో కనిపెట్టడంలో వుండే థ్రిల్లే వేరు.

మోహనం లాగే హిందోళం, అమృతవర్షిణి రాగాలు కూడా మంచి starting points. ఇంకెందుకాలస్యం ఇప్పుడే మొదలెట్టండి మీ పయనాన్ని!.

మీలో ఎవరికైనా కర్ణాటక సంగీతం గురించి ఆసక్తి వుండి ఎలా మొదలుపెట్టాలో తెలియకపోతే నేను గతంలో రాసిన వ్యాసం చదవి మరిన్ని విశేషాలు తెలుసుకోవచ్చు.

కాకపోతే పోయిన సారి రాసిన వ్యాసంలో కర్ణాటక సంగీతం గురించి రాసిన కొన్ని వ్యాసాలకు లింకులు ఇచ్చాను. కానీ అవన్నీ చదివి అర్థం చేసుకునే ఓపిక లేని వాళ్ళకి ఒక quick start లాగా ఈ వ్యాసం పనికొస్తుందని నా అభిప్రాయం.

మనవి.
నేను సంగీతం గురించి రాస్తున్నాను కదా అని నాకు సంగీతంలో అనుభవముందనొ, ప్రావీణ్యత వుందనో భావించవద్దు. ఏదో నాకు కర్ణాటక సంగీతం ద్వారా కలిగిన ఆనందాన్ని నలుగురితో పంచుకోవాలనే నా ఆలోచన, తపన. ఈ వ్యాసం చదివే చాలామందికి సంగీతంలో ప్రవేశం వుండివచ్చు. అలాంటి వారు నేను రాసిన దాంట్లో ఏవైనా తప్పులుంటే మన్నించి కరెక్ట్ చేయగలరని మనవి. అలాగే శ్రీరాం, కొత్తపాళీ లాంటి వారు కూడా కర్ణాటక సంగీతం గురించి తమ బ్లాగుల్లో రాసి తెలియని వారికి మరింత జ్ఞానాన్ని అందివ్వగలరని మనవి.