24fps.co.in

మొన్నా మధ్య తమిళనాడులో కిరీటం అనే సినిమా విడుదలయ్యింది. అజిత్ నటించిన ఈ సినిమా సూపర్‌స్టార్ రజనీ సినిమా శివాజీ ని వెనక్కి నెట్టి ఇప్పుడు బాక్సాఫీసు కలెక్షన్లలో మొదటి స్థానంలో నిలబడింది. ఈ సినిమా దాదాపు ఒక దశాబ్దం క్రితం మలయాళంలో మొహన్‌లాల్ నటించిన కిరీటం అనే సినిమాకు రీమేక్.

తమిళంలో ఈ సినిమా హిట్టయిందని తెలియగానే మన ఏంగ్రీ యంగ్ మేన్ రాజశేఖరుడు ఈ సినిమా రీమేక్ హక్కులు పొందడానికి హడావుడిగా ప్రయత్నాలు మొదలుపెట్టారట. ఇంతకీ మన రాకశేఖరునికి తెలియని విషయమేమిటంటే ఇదే సినిమాను గతంలో రౌడియిజం నశించాలి అన్న పేరుతో ఇప్పటికే తీశేసారని. తెలియక పోవడం తప్పేమీ కాదు. కాకపోతే రౌడీయిజం నశించాలి సినిమాలో హీరో రాజశేఖరే కావడంతో ఆ విషయం ఆయన తెలుసుకుని వుండాలి అని అనుకోవడంలో తప్పేమీ లేదు. ఈ విషయం గురించి ఒక తెలుగు సినిమా వెబ్సైటులో చదివి మొదట్లో ఆస్చర్య పడ్డా తర్వాత అదేమీ అంత వింత కాదనిపించింది.

చూసే జనాలు వుండేవరకూ వీరు ఇలాంటి ప్రయత్నాలు ఆపరు. ఈ రీమేక్‌లు డబ్బింగ్ ల పరవం ఎంత వరకూ వెళ్ళిందంటే గతంలో తెలుగులో సూపర్ హిట్టయిన సినిమా నరసింహనాయుడిని తమిళంలో అర్జున్ రీమేక్ చేసుకోగా అదే తమిళ సినిమాను మళ్ళీ తెలుగులోకి డబ్బింగ్ చేసి విడుదల చేసారు ఎవరో తెలివిగలాయన.

ఇంతకీ ఈ కిరీటంలోని కథేమైనా పెద్ద గొప్ప కథయ్యుంటే పోనీలే అనుకోవచ్చు. పోలీసు కానిస్టేబులయిన తండ్రి తన కొడుకుని ఎప్పటికైనా పోలీసు ఇన్స్‌పెక్టర్‌ని చేయాలన్న ఆశయంతో వుంటాడు. అప్పుడే కాలేజీలో పట్టభద్రుడై ఇంటికి వచ్చిన కొడుకుతోపాటు మరో వూరికి బదిలీ అవుతుంది ఆ కుటూంబం. ఆ కొత్త వూరిలో ఒక పెద్ద రౌడీ. పోలీసులు ఆయన వైపు కన్నెత్తి చూడడానికి కూడా భయపడుతుంటారు. ఒకరోజు అనుకోని పరిస్థుతుల్లో ఆ రౌడిని ఎదుర్కుంటాడు ఆ కానిస్టేబుల్ తండ్రి. ఎదురొచ్చిన ఆ కానిస్టేబుల్ ని చంపేస్తాడు ఆ రౌడీ. తన తండ్రిని చంపిన రఊడీ ని చితగ్గొడతాడు కొడుకు. చివరికి ఆ రౌడీ మధ్య, ఆ కానిస్టేబుల్ మధ్య తలెత్తిన గొడవల్లో తన తండ్రిని చంపిన ఆ రౌడీని చంపి పగ తీర్చుకుంటాడు కొడుకు. క్లుప్తంగా అదీ కథ. ఈ మాత్రం కథ మనవాళ్ళలో ఎవరూ రాయలేరా? ఏమిటో అంతా మాయ.

ఒక వేళ రౌడీయిజం నశించాలి సినిమా కిరీటంకు రీమేక్ అయ్యుండి, తమిళ్ లో హిట్టయింది కదా అని మళ్ళీ ఇప్పుడు తెలుగులో తీస్తే జనాలకి ఇంతకంటే పెద్ద టోపీ పెట్టిన ఘనతను దక్కించుకుంటారు ఈ సినీ నిర్మాతలు.