24fps.co.in

మన జీవితంలో మనమెన్నో కథలు, కథానికలు, పద్యాలు, కవితలు, పాటలు పుస్తకాలు చదువుతుంటాము. కొన్ని నచ్చుతాయి. కొన్ని నచ్చవు. కాని నచ్చిన వాటిల్లో కొన్ని చిరకాలం గుర్తుండిపోతాయి. కొన్ని చదివి కళ్ళల్లో నీళ్ళు తిరుగుతాయి కూడా; బాధతో కాదు సుమా! గుండెలనావరించిన ఆనందం అక్కడ పట్టలేక ఆనందభాష్పాలుగా కనుకొనలనుండి మెల్లగా జారి తిరిగి హృదయాన్ని చేరుతాయి.నా జీవితంలో ఇలా జరిగిన సందర్భాలు ఎన్నో ఉన్నా ఇక్కడ కొన్నింటిని ఉదహరించడానికి ప్రయత్నిస్తాను. ముందుగా సీతాకోకచిలుక గురించి ‘అరుణ్ కొలాత్కర్ ‘ రచించిన ఈ కవిత చదవండీ.

The Butterfly
There is no story behind it.
It is split like a second.
It hinges around itself.
It has no future.
It is pinned down to no past.
It’s a pun on the present.
Its a little yellow butterfly.
It has taken these wretched hillsunder its wings.
Just a pinch of yellow,
it opens before it closes
and it closes before it o
where is it?

పై కవితలోని ప్రత్యేకతను మీరిప్పటికే గ్రహించి ఉంటారు. ఒక క్షణం మన కళ్ళముందుంటూనే, లిప్త పాటు లో మాయమయ్యే సీతాకోకచిలుకను వర్ణిస్తూ ఆయన రాసిన ‘It is Split like a second’ అన్న లైను త్వరలో పాఠకునికెదురవ్వబోయే ఆశ్చర్యాన్ని సూచిస్తుంది.ఇలా చిన్న కవిత లోనే ఎంతో చెప్పే ప్రయత్నం ఒక ఎత్తైతే ‘and it closes before it o’ అన్న లైనులో,”అరే, ఇప్పటిదాకా ఇక్కడే ఉంది.ఇంతలోనే ఏమైపోయిందన్న ఆశ్చర్యానికి అక్షర రూపమిచ్చి అద్భుతమైన ప్రయోగం చేశారనిపించింది.

ఇలాంటి మరో ఉదాహరణ సిరివెన్నెల సీతారాం శాస్త్రి రచించిన ఒక సినిమా పాట.

“ఓ చిన్నారి చిలుకమ్మా, నువ్వు కరిగేది ఎప్పుడమ్మా” అన్న ఈ పాట ఏ సినిమాలోదో తెలియదు కానీ ఈ పాటలో వచ్చే ఒక లైను నా పై చాలా ప్రభావం చూపింది.

“నీళ్ళల్లోని చేపకు కన్నీళ్ళొస్తున్నాయని చెప్పేవారు చూపేవారు ఎవరమ్మా, తన తడి తెలియదె తనకైన” అంటూ సాగే ఆ పాట అత్యున్నత సృజనాత్మకతకు తార్కాణం. శితారామశాస్త్రి గారి ఎన్నో పాటలు నాకు నచ్చినప్పటికీ ఈ పాట నాకు అత్యంత ఇష్టం.

పైనుదహరించిన వాటి లాగే నన్ను బాగా కదిలించిన మరో లైను A K Ramanujan ఇంగ్లీషులో రచించిన ఒక కవితలో వచ్చే ఈ లైను-”If there is nothing you see on the tree , it is the chameleon you are seeing”.

నేనెన్నో కవితలు చదివాను గాని ఒక రోజు సాయంత్రం హైదరాబాదులో ఈ లైను చదివినప్పుడు నేను పొందిన ఆనందం వర్ణనాతీతం. అది దివ్యానుభూతి. ఆ ecstacy నుంచి బయటపడడానికి నాకు షుమారు రెండు రోజులు పట్టిందంటే నమ్మండి.

ఇలాంటివి చదివినప్పుడల్లా ,”ఛీ, మనమూ రాస్తున్నాము. ఎందుకు పరమ దండగ!” అని ఒక వైపు దిగులేసినా , మరోవైపు ఇంకా బాగా రాయాలనే ఉత్సాహమూ కలుగుతుంది. ఏదేమైనప్పటికి తమ సృజనాత్మకతతో పాఠకుల కళ్ళెదుట కొత్త ప్రపంచాన్ని ఆవిష్కరించగలిగిన వారే నిజమైన కళాకారులు!